- السلام عليكم و رحمة الله تعالى و بركاته
- الشهر اللي فات تسلطات عليا القشرة ما عمرني عرفت شنو هي القشرة حتى شفتها و شفت معاناتها وخا ما خليتهاش حتى كثرات فشعري و لكن راه خايبة خصوصا عندي واحد الراجل غير تيلاحظ تبارك الله عليه عندو العينين ديال زرقاء اليمامة. و بقيت مميكة على القشرة تنقول دابا تمشي بوحديتها وتنغسل ديييما حيث ولات كتيدم ليا الفروة دالشعر و لكن وخا هكاك ما تيجي فين ينشف الشعر حتى تبدا تبان عاود . ايوا حتى جا عندي سي السيد و قاليا ما تبقايش تغسلي شعرك بالما سخون بزااف راه ولات عندك القشرة فشعرك … و انا يشعل معايا الضوء راكم عارفين احنا العيالات تنتقبلو الملاحظات من عند كلشي الا من عند الرجال هههههههه و انا اصلا ما تنبغيهش يشوف مني شي حاجة ما زويناش , المهم جلست تنقلب فالأنترنت على شي وصفة مزيانة و لا شي دوا تنلقا هالبصلة هالزعتر هالقرنفل هالشيبة وما يمكنش وحدة مزوجة تديرها حيث تتبقى فالشعر ريحتها مجهدة وخا تتغسل , ايوا و أنا نلقا واحد الأخت الله يجازيها بخير تتنصح بخل التفاح فالتشلال الأخير ديال الشعر و أصلا كان عندي موجود غير محطوط و مشيت دهنت شعري بعدا بالزيت اللي موالفة تندير ليه و بقيت تقريبا شي ساعتين و من بعد دخلت دوشت و خديت تقريبا 3 ملاعق كبار ديال خل التفاح و درتو فالطاسة و زدت عليه الما دافي و مللي غسلت شعري بالشمبوان مزيان شللت بداك الما ديال الخل و شققت بيه مزيان باش يدخل و خليتو تقريبا شي 7 دقايق رغم أن مولات الوصفة قايلة نخليوها 15 دقيقة و لكن جاني البرد و درت الديميلور بالزربة غير من الفوق بلا ما يقيس الفروة دالراس باش يحيد ديك الريحة الخانزة دالخل و خليتو واحد 2 دقايق و شللت شعري بالماء دافي تيميل للبرودة و صااااافي الحمد لله من تما ما عاودت شفتها تسنيت شعري حتى نشف و الله اخواتي الى ماكينش حس قشرة وحدة الحمد لله ما صدقتش أنه يكون المفعول من المرة الأولى
- وعاودت دوشت من موراها و وااالو الحمد لله مشاات و بغيت نقولكم راه احد اسباب القشرة هو الغسيل بالما سخون وراه خطأ كبير خصوصا مع الشعر الفروة ديالو راها ماشي قاسحة بحال الجلد ديال الجسم و كتحسس من شحال من حاجة , اللهم ديما فالغسيل ديال الشعر نبردوا الما شوية , و منين تشريوا الخل خودوا ديال السوبر ماركت ماشي ديال العطارة اللي مكتوب بالعربية حيث هداك راه زيروفايت ليا جربتو فشحال من حاجة و ريحتو ما مجهداش بحال داك اللي تيجي مستورد أو ممكن تحضروه في البيت من الأحسن .
↧
لكل السيدات لي كيعانيو من القشرة جبت لكم الحل للتخلص منها دقة ببطلة ومن أول إستعمال
↧