- لاش كيليق هاد الكوماج :
- هاد الكوماج يليق للبنات اللي كيشكيوا من :
- الحبوب في الجسم، القشور في الجسم و فالوجه، البقع البنية فالجسم، تباين الألوان في البشرة، جفاف البشرة من مورا الحمام
- وأخيرا ممكن لأي بنت بغات تحافظ على جمال بشرتها و تخليها مصقولة تبقى تديرها
- طريقة الاستعمال :
- فاش تكونوا كتاخدوا دوش أو فالحمام و من الأحسن الحمام لأن المسام كيكونوا مفتوحين , مللي تحكوا الجسم كامل و تغسلوا الشعر ..الخ , غادي تاخدوا فوطة و تنشفوا بيها جسمكم مزياان , و تطليوا الكوماج لكامل الجسم و الوجه و جميع المناطق بدووون استثناء , و تبداو تفركوا بالزربة و تخليوه ينشف فوق منكم واحد الشوية , يعني يبقى فالجسم لمدة لا تقل عن 15 دقيقى كحد أدنى , و ممكن فهاد الوقت أنكم تحكوا رجليكم و هادشي اللي كندير أنا و باش نزيد نستغل الوقت يا اما كندير الديميلور فداك الوقت أو كنطلي شي يوغورت لراسي و نكون ضربت عصفورين بحجر , من بعد انقضاء المدة تغسلوا جسمكم مزياااان و تدوزوا بالجيل دوش و لا الصابونة ديالكم و بالصحة و الراحة .
- ملاحظة هامة :
- صاحبات البشرة الحساسة ممنوع منعا باااتا يوضعوا هاد الكوماج على الوجه
- مكونات الكوماج :
- عصير نصف حامضة كبيرة أو عصير حامضة صغيرة + 2 ملاعق كبار ديال قشور البيض مطحون ( أنا كنت كنجمع البيض و نطحنه و نطلعه للشمس شي 3 أيام عاد كنهبطه و نستعمله ) + 3 ملاعق كبار ديال شي عصير , أيييي عصير عندكم استعملوه و يستحسن العصائر اللي فيها الأحماض , بحال هنا أنا عندي عصير ديال الفريز مع البامبلموس + 2 ملاعق كبار ديال دقيق القمح
- الطريقة :
- أولا كنخلطوا العصير ديال الحامض مع قشور البيض حتى كنشوفوه دار هاد الرغوة
- من بعد كنعاينوا عليه واحد 30 ثانية دغيا راه كيتجبس و كيتجمع ,
- من بعد كنزيدوا عليه العصير اللي عندنا حتى يتطلق
- و نزيدوا عليه الدقيق ديال القمح هو الأخير و نخلطوا الكل مزيان حتى يجي عندنا خليط ثقييل شوية فحال ديال الكيك أو أثقل
- و هالكوماج ديالنا واجد
- بالنسبة للبنات اللي كيعانيوا من حبوب كثيرة فالظهر أو من حكة ممكن يضيفوا نصف ملعقة كبيرة ديال الملحة و يستعمل كما قلت فالطريقة الفوق و منين تغسلوا و كلشي طبعا ما تنساوش تدهنوا جسمكم بشي حليب أو شي كريم مغذي لأن الجسم فالحمام أو أثناء الدوش كيفقد كمية كبيييرة من السوائل , لهذا كثؤوا من الترطيب فالأيام الموالية للحمام و ايضا شربوا الما من مورا الحمام , لأن هذا ينعكس ايجابا على البشرة و مكيخليهاش تعاني من الاسمرار و من الجفاف .