مكانش لي مسمعتش بكيكة قدرة قادر او جرباتها لانها فعلا كيكة رائعة لفي المنظر ولا المداق وهده ثاني مرة كنديرها
وهده الكيكة ما فيها لا زفورة نتاع البيض و لا شي والكريم كيكون متماسك.
إو بلا منطول عليكم نبداو على بركة الله
المقــــاديــــــر :
* الكراميل : 1 كاس سكر
* مقادير الكريم : 4 بيضات + كاس صغير نستلي حلو + كاس صغير حليب غبرة + قشور حامضة محكوكة + 3 كيسان كبار حليب + 1 لفاني
* مقادير الكيك : 3 بيضات + 1 لفاني + كاس صغير سنيدة + كاس صغير حليب + كاس صغير زيت + قشرة حامضة محكوكة + 1 م ص نسكافي + 3 م ك كاكاو + 1م ص و نصف خميرة الحلوى + 2 كيسان صغار و نصف دقيق
الطريــــــقــــــة :
-كنحضرو الكراميل : كندوبو السكر في مقلاة متكونش تلصق حتى يولي كراميل(غير يحمار نزولوه ماشي كاع يتحرق) ونصبوه في المول بلا مندهنوه ونخليو جانبا
- كنحضرو الكريم : في خلاط كهربائي كنضربو المقادير كلها(ماعدا الحليب السائل)
- من بعد نضيفولهم الحليب ونكملو الخلط ونصبو الخليط فوق الكراميل
كنحضرو الكيك : كنديرو الحليب مع نسكافي فوق البوطة حتى يدفاو ونخليوهم على جنب ونطربو البيض بالضراب الكهربائي مع السكر ،لفاني و قشرة الحامض حتى يبياضو و يتضاعف الحجم ديالهم ونضيفو الزيت و نحرك بالضراب اليدوي ونضيفو الحليب و نسكافي
ثم الدقيق + الكاكاو + الخميرة ونخلطو الكل مزيان ونصب خليط الكيك على الكريم وغير بشوية نحطو المول وسط قالب آخر على شكل حمام مائي ساخن جدا و ندخلها للفرن 55د حتى طيب ونخرجوها من الفرن و نخليوها تبرد ونقلبوها غير بشوية ومن بعد ندخلوها الثلاجة تبرد مزيان على الاقل شي 6ساعات، عاد تقدم و إلى باتت تكون أحسن إوا كيجاتكوم تستحق التجربة
وبالصــحـــــة والـــــراحـــــة