كاشير بالبيض والفرماج لذيذ بزاف وساهل وأهم حاجة أنه تحضير منزلي

من فترة طويلة ماحضرتش الكاشير والسبب هو طريقة طبخه
كيفما كيعرف الجميع كنديروه في ميكة ديال سباكيتي او في واحد الانية خاصة لكن مرة كنت كنحضر فيه وذابت الانية فوق العافية
مبقتش حضرتو لهاد السبب
لكن ليوم طاحت عليا واحد الفكرة وقلت علاش منطيبوش في الكسكاس بحال الطريقة لي حضرنا بها الكيكة مؤخرا
والحمد لله نجحات تجربتي والاهم أن كاشير في الكسكاس كيطيب بسرعة
نخليكم مع المكونات والطريقة وممكن تستعملو المقادير لي بغيتو انا استعملت طريقة كنت مجرباها من مدة
خذيت 4 بيضات + 4 فرماجات + كاس ونصف فورص + كاس صغير زيت + قزبر ومعدنوس مقطعين + ملون + ملح + ابزار + كامون + 2 فصوص ثوم محكوكين + الهريسة ولكن انا نسيتها ليوم + اما كنور كيعطي لذة ولكن مكنستعملوش في الطبخ نهائيا لانه مضر بالصحة، جمعت كلشي في المولنكس، طحنت المكونات مزيان
نجيو دابا لفكرتي الجديدة ولي هي الغرض من الموضوع خذيت كؤوس دهنتهم بالزيت وغلفتهم بالسولوفان، وكبيت فيهم الخليط وحطيتهم في الكسكاس، استعملت الزيتون في كاس واحد لان راجلي مكيبغيش الزيتون، غطيتهم بثوب باش يشرب البخار
وخليتهم يطيبو، شكل ديالهم بعدما طابو
جاو مبوقين ههههه المهم انا عطيتكم الفكرة لكن المنظر ما مسؤولاش عليه ههههه
لاحظت واحد الشوية تسرب للكاس ولصق وهذا دليل على ان السلوفان لعب دور مهم لان الكاشير تحيد منهم بكل سهولة
صورتهم ليكم مقلوبين ههه
شكله بعد التقطيع