الفران ديال الضوء ماكيطلعش ليك الخبز مزيان أجي نوريك واحد الحل أكثر من رائع

عندي فران تاع الضو عادي جداً من النوع الرخيص ماشي دوك الغاليين تاع تلاتة آلاف درهم
المهم جبت ليكم اليوم بعض التعديلات اللي دخلتها عليه باش يولى كيعطيني خبز رائع
أولا تنشعلو نص ساعة قبل ما نرمي فيه الخبز باش يسخن مزيان و الحرارة تكون 280 درجة ضروري يلا بغيتي يجيك الخبز رطب
و تنكون دايرا فيه إناء صغير فيه الماء
باش يتبخر الماء و يعطيني رطوبة مرتفعة داخل الفرن
من بعد شريت فراح تاع الطين يكون غليظ اللي تيطيبو عليه البطبوط تيسوا عشرة دراهم هرست ليه جنابو بيد المهراز بحذر باش مانهرسش الوسط حيت هو اللي عندي بيه الغرض
و حطيتو في الفرن مقلوب بهذا الشكل
كبديل لحجر الخبز اللي تيتباع غالي و يلا لقيته بعدا
في هاد الحالة خصاتني شي حاجة اللي غنرمي بها الخبز في الفران ما عنديش داك البالة تاع الخبز فاخترعت واحدة ها هي في الصورة
انطلاقا من شواية كانت عندي قديمة
درت عليها طرف تاع الكارطون مطوي على جوج و شديتو بالسكوتش من الجانبين و قضيت الغرض
هذا خبزي بخميرتي البلدية فقط و طايب في فراني المتواضع و بدقيق القمح الكامل بدون فورص