طريقة رائعة لصنع ديميلور ديال الشعر في الدار جربيه و ردي عليا الخبار

بدون مقدمات راني ترتارة هههههههههههههه هده هي المقادير : واحد اليوغورت مسوس على حساب طول وكثافة الشعر انا استعملت النص كفاني
من بعد كنزيد عليه 2 ملاعق كبار ديال حليب الكوك , و هنا سمحولي لأنني رميت البواط ديالها و لكن راه قربات تسالى ليا ان شاء الله منين نشريه عاود نوريه لكم , و على العموم راه ما غاليش ثمنه 16 درهم تلقاوه فمرجان جنب البواطات ديال les champignons , المهم نزيدوا منه 2 ملاعق كبار على اليوغورت
و ناخدوا نص حامضة نعصروها مزيان و نزيدوها على الخليط، من بعد ناخدوا ملعقة صغيرة عامرة ديال العسل الحر، من بعد كناخدوا شي زيت مرطب , أنا هنا خديت زيت الحية و لكن ماشي بالشرط , ممكن تستعملوا غير زيت الزيتون و لا زيت اللوز و لا أركان و لا اللي وجد انا استعملت زيت الكوك
و نخلطوا الكل مزياااان و ها هو وااجد

طريقة الاستعمال :
طبعا عادية , كنغسل الشعر بالشمبوان مزيان و نعصروا مزياااان و ندوزو فوق منه الفوطة حتى ينشف شوية ما يبقاش يقطر , من بعد نطلي هاد الخليط لراسي و ضرووووري نحط شي بونيه فوق راسي , و يبقى لأطول مدة تقدروا تخليوه , يعني على الأقل 30 دقيقة على الأقل , و فهاد الوقت طبعا انتاهزوا الفرصة و ديروا شي حاجة للجسم أو حكوا ظفاركم و الأقدام …الخ , اعطا الله ما يتدار أنا 45 دقيقة اللي كنخليه ديما .

من بعد يتغسل بالماء و لكن ماااشي بزاف يعني غير ما تبقاوش تشوفوا الما أبيض يعني صفا باراكا من الغسيل حبسوا , و مللي تنزلوا دهنوا بكريم الدهن و لا باش موالفين كتدهنوا
والنتيجة اكثر من رائعه :
انا شعري طوييل والتحت ديالو مشوك وعامر بالبوانت داير فحال الشطابة، وديما كنقول نقطعو ولكن مسخيتش بيه
ومخلييت مجربت من شمبوان ماسك مكيدير ليه واالو دغيا يتخبل ويتشنتف
ولكن مع هاد الوصفه ليبوانت مبقوااش وشعري ولا زويين غير باتشا وبان واعر
جربوها وشوفو رااسكم انا بعدا غنبقا دييما نديرها.
و ملاحظة صغيرة هاد الخلطة مع المداومة كتطول الشعر فوقت قصير لأن فيها حليب الكوك هو معروف كيدفع الزغبة .
ايوا شي دعيوات الغزالات